منتدى سيما للقصص والحكايات المغربية

كل مايتعلق بالقصص والحكايات المغربية من كتاباتي انا سامية وايز
 
الرئيسيةاليوميةس .و .جبحـثالأعضاءالمجموعاتالتسجيلدخول

شاطر | 
 

 الفهد الجريح للكاتبة : sima wise (سامية اد لامين SAMIA ID LAMINE)

اذهب الى الأسفل 
كاتب الموضوعرسالة
youssra



المساهمات : 184
تاريخ التسجيل : 28/07/2017

مُساهمةموضوع: الفهد الجريح للكاتبة : sima wise (سامية اد لامين SAMIA ID LAMINE)   السبت يوليو 29, 2017 2:57 am

قصة فائزة بالمركز الاول في مسابقة للقصة القصيرة .
ليلة وحدة...زمن قصير..مستحيل نتخيلو انه ممكن يقلب حياة وكيان فتاة منا رآسا علا عقب.. عاشت فيها الحب والرعب.. ولكن فقدات قلبها وراحتها موراها...


منتصف الليل... وسط العاصمة... شارع الامل.بالضبط مصحة الشفاء.. الممرضة الشابة كتسالي مداومتها...كتغير لباسها الوردي الموحد لي بلون وجنتيها.. كترتدي جينز اسود.. وكنزة صوفية بلون دم الغزال...كترتب ظفيرتها.. المنسدلة علا كتافها....وكتنزل تعدل رباط حذائها الاسود.. قبل متخرج كتاكد واش ماشافها حد باش تهز علبة من دواء الضغط.. كانت مخبياها فخزانتها.. كترميه بسرعة وبارتباك فحقيبة ظهرها الجلدية..كتلبسها.. وكتمشى بزربة فاتجاه البوابة مان خرجات منها وتعداتها.. لعبات نسمات ليلية بشعرها... تنفست بعمق... ولكن هيهات نداء جاي من هنا.. من القريب وقف قلبها خلاها تدور دورة كاملة حول نفسها وهلسانها كيتمتم كل مكتعرفو من ادعية.. وابتهالات .

حارس الامن:جوري بلاتي تسناي..
جوري: ا ممم معاذ شنو.
معاذ والو اختي غير نسيت ماقلتلك بلي مول الطاكسي لي مولف يجيلك.. راه تسنا حتا عيا وطلعلو الدم ومشى..اش عطلك ونتي عارفاه كيف داير صبرو قليل ودغيا كيطلعلو السكر..جوري: هذا وكان تفو عليك نقزتيني بالخلعة..تعطلت مع الدكتور رامي بن شقرون فواحد العملية..معاذ: وشنو غاديري دابا جوري: الديار ديال مولانا.. غنتمشى لرونبوان وناخد طاكسي كبير..معاذ: راه الليل هذا والدنيا خاوية ومنقدرش نهلي البوسط ديالي باش نمشي معك.. جوري: غير ارتاح... ختك راجل مولفة نضربها بالرجل فهاد الوقت الله يعاونك..
تمشيت فداك اليل .هدوءه ..استفز مكنوناتي وخلاها تترجم لدموع.. جوري او هذا الاسم لي عطاوني الناس لي رباوني.. قالولي خداوني من من ملجآ.. حيت كانو مزوجين عشر سنين ومجاوهمش ولاد ولكن ملي درت خمس سنين..حملات المتبنية.. ورماوني لزنقة.. بقيت كنتلاوح حتا وصلوني شي ناس للبوليس رجعت للخيرية قريت.. وملي حق عليا نخرج منها خدمت وكريت مع بيت مع الجيران.. خرجاتلي مباراة تكوين ممرضين فالخواص وتسجلت قريت وخدمت علا راسي وهادي خمس سنين. باش خدامة فمصحة الشفاء وكارية فالخرجة دالمدينة..ومامونس وحدتي..غير خالتي شامة..جارتي ولادها مكيسولوش فيها وعلا قبلها تخلعت قبيلة حيت الدوا كنجيبولها من المشفى كل شهر مابغيتش نقول كنسرقو باش جاتهم علبة وحدة كاع مكيحسو بيها ولكن بالنسبة لخالتي شامة كتعنيلها بزاف....جبدت تلفوني المتواضع لصقت الكيت فوذني.. واول اغنية حزينة.. بديت كنتسنط لها.. شوية تسمع صوت فرامل قوية.. سيارة كحلة..والشخص لي كان سايق نزل لعندي ..عاد غيهضر معايا ضربتو للمنطقة المعلومة.. وانا نطلق رجليا للريح خليتو مكور... كنجري ونلحث قلبي وصل لفمي... والدنيا خاوية لامن يعتقك ماكاينش... حتا قلت بعد ولكن ضو السيارة وصوتها بث الخوف فنفسي من جديد.. نزل تسمع صوت الباب تسد.. جرا وكان قوا مني واخا ضعيف ورقيق..شدني من عنقي.. ودورني لعندو ..هي صفعة وحدة منو كانت كفيلة بافقادي الوعي والاتزان
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
youssra



المساهمات : 184
تاريخ التسجيل : 28/07/2017

مُساهمةموضوع: رد: الفهد الجريح للكاتبة : sima wise (سامية اد لامين SAMIA ID LAMINE)   السبت يوليو 29, 2017 2:59 am


قطرات الماء البارد لي كترش علا وجهي بدون توقف قدرات تفيقني...شريط احداث اليلة داز قدام عيني جيت جالسة مور ماكنت ممددة علا اريكة. جوري: فين انا وشكون انت وعلاش خاطفني وعوك عوك اعيباد واك واك عتقو الروح... وااااااالبوليس والعمااالة والماليييك.. واممم ومممم.. الشاب: سكتي.سكتي ولا داكشي لي نويتي فبالك هو لي غنديرو.. انا بغيت من عندك ليلة وحدة اعتبري نفسك خدامة فالكلينيك وغنعطيك زوج دلمليون دالسنتيم 20000درهم ...جوري: اهه هممممم عرفني باغا نقول شي حاجة طلق فمي وكيمسح ريقي لي عمر ايدو فحوايجو بقرف ..بزاف عليك لهلا يحييك ويوصل ايديك لرجليك ياشويش دالرجال ياسفود العيد... ياسلم الشفارة.. بغيتيها راه جيبها من الموقف تعطيك حتا عشرين ليلة ومتوصلش داك الثمن.. الشاب: نتي مال عقلك موسخ.. جبد السلاح من ورا ظهرو ورجع لاحني عل الفوتوي.. هييه نتي سمعي مافيا ميتجابد معاك ويضيع فالوقت وخويا كيموت الداخل.. كتسمعي ..دخلي ديري خدمتك .هادشي لي قصدت بليلة.. جوري: اه اه ولكن علاش متديهش لطبيب.. احسن يعرف مالو ان غير ممرضة نخيط جرح ندير دوا نقابل حرارة ونركب سيروم هذا كثيري.. الرجل: منقدرش نديه للطبيب ومتسولينيش علاش الا بغيتي فلوسك.. هادشي لي فلتي كتعرفي تديريه هو لي بغيت انا بالضبط.. تحركي البيت من هنا.. وهاكي مانيطة فيها ادوات الاسعاف ومستلزمات طبية.. واتحركي غتبقاي تعبري فيا.. جوري: واصافي هاهيا غادة متدفعش.. باينة فيكم مافيوزية ياك ياك.. الرجل: صبرررررررك يارب .هوووف.. جوري: صافي صافي وانت كتزفر سعير جهنم من فمك الحرارة وصلاتني لفين انا واقفة... ولكن متدخلش معايا غتديرونجيني فالخدمة.. الرجل: ايوا سيري هاني واقف هنا.. خليتو وهزيت المانيطة نشوف خو هاد السفريط.. كنا فشقة.. مرتبة واخا اثاثها قليل وموديلها غربي ولكن باينة جاية فدور مرتفع بزاف .هادشي شفتو من زجاج النافذة... لي فطريقي للغرفة... توقعتو غيكون طفل تجرح اذا نفسو فغياب خوه الكبير ولكن.. ياالهي مان فتحت الباب.. حتا استحضرت جميع ابطال الافلام معرفتش حتا لمن نشبهو.. مز ياخواتي مززز.. طويل وصحيح..شاد السرير طولا وعرضا كتافو عراض ملامحو سووود بزااف حادين.. كان شاد بيدو خرقة بيضة حاطها عل الجرح.. مغمضة عينيه سنانو كيصطكو بالبرد ..وكينين من الالم... قربت.. لعندو وقفت مقابلة.. ملامحو.. ولكن غفلني وجبد سلاح من تحت اللحاف ووجهو لي بايدو لي فالجهة السليمة وتعلا من السرير.. بقا متبت نظراتو عليا وسلاحو موجه ليا انا من خوفي رميت الحقيبة وخكهزيت ايدي بزوج فوق راسي بحال الافلام..لكن سرعان مرجع لمكانو.. وتزاد صبيب العرق.. قبل ماعينيه يتقلبو ويدخلو فراسو.. نطق: دغيا عافاك

زولت بالزربة الثوب لي كان بيض وولا حمر بالدم كنشوف...جرح غائر...ميمتي رصاصة كيف ندير نحيدها بلا بنج.. غيتآذى سمعني.. ونطق بصراخ من الالم. زووووليييها ...حليت العلبة كنقفقف.. جبدت مشرط.. جديد ومعقم ايدي كيترعدو... وكنسرط فريقي شقيت اللحم... هو زاد زيييير علا اللحاف وكينين بصوت مكتوم... دار فوطة فمو... انا جبدت ملقط... الرصاصة.. كانت باينة الحمد لله.. انها جات فالذراع..
العرق كيتزاد ودقات القلب كتسارع حسيت انه اسوء واخطر موقف تحطيت فيه.. جبدتها.. هنا هو غووووت بالجهد وغيب.. بدا الدم كيسيل من الجرح... حطيت ضماد ..وبيتادين حتا تحبس الدم شوية عاودت عقمتو.. وخيطت الجرح.. ركبت مصل مغذي ..وعلقتو فوق السرير... جلست حداه ..بلا منحس انجدبت مديت ايدي كنمررها علا لحيتو الكتيفة ملامحو.. وكنمسح درات العرق.... حتا تحل الباب.. الشاب: ساليتي .جوري: وي وي ساليت .الشاب: يالاه نوصلك جوري: لا مغنمشيش.. بغيت نقول مغنمشي حتا يفيق خصني نبقا حداه حيت ضروري مترتفع الحرارة ديالو ومن هنا لساعتين خصني نعطيه حقنة.. نعرفتش علاش يقيت كندخل ونخرج فالهضرة رغم اني ساليت ولكن مقدرتش نمشي ...اول مرة نعرف احساس الاعجاب ..وفين بمريضي شخص جريح ربطتني بيه الاقدار فليلة..وحدة.. حرك الشاب راسو: وانا.. اجي تاكلي شي حاجة غتكوني. جعتي.. هبطت راسي وتبعتو فعلا جاني جوع..الفودكودغ كيجيب الجوع... رجعنا جلسنا فداك الفوتوي حط قدامي كاس كولا كبير وعلبة بيتزا.. وصحن فواكه... وجلس حدايا شعل التلفزة ودار رجل علا رجل وبقا كيتفرج.. شوية ناض.. قافز.. انا استغليت غيابو وبديت كناكل مكبعجبنيش ناكل قدام بنادم... حتا وقف عليا من جديد بحال الجن.. وحط.. ظرف قدامي ورجع جلس فين كان مسح ايدي فسيرفيت لي كانت فوق رجلي وحليتو كنلقى الفلوس باش واعدني.. ضرت لعندو بلا منتحكم فلساني لي حسيت بيه قلتو جوري:مبغيتش لفلوس.. اعتدل فالجلسة وشاف فايدي لي مادالو لفلوس الشاب: واش بغيتي جوري: بغيت مقابل لانقاذي خوك الشاب: لي هو مادام ماشي فلوس؟، جوري: تعاودلي قصتكم.

سكت وطول فالسكات بزاف.. عرفت انه يستحيل يعاودلي واني تطفلت.. هزيت طرف من البيتزا قضمت منو وتبعتو بجغمة كبيرة من المشروب الغازي نسرط بيها..احراجي.. لكن حروفو وكلماتو المسرسبة تباعا.. رجعت لي الامل باش نعرف... سبب جرح.. الشخص لي طحت فيه من اول نظرة...بلعت لي فمي بسرعة.. ودرت نشوف فيه بانتباه.. الشاب: انا غنتيق.فيك وغنعاود لك.ولكن كنواعدك الا قلتي لشي حد شي حاجة مغنترددتش لحظة اني نقتلك
جوري: كنواعدك وكنحلفلك انه..اي كلمة تقالت غنساها فساعتها ومغنرددهاش حتا بيني وبين نفسي...
الشاب: سميتي نبيل.. وهذا لي مرمي الداخل الشاف ديالي وبحال خويا.. فهد بن خلدون 32 عام.. مهندس عاطل عن العمل..
وانا موجز فالحقوق....كان عندنا صديق سميتو نوفل صغر منا يكون فعمرك تقريبا شي 23 عام خدام فمحل ميكانيك.. وبسمة حبيبة فهد حتا هي مازال صغيرة بحال نوفل.. كان كيبغيها بزاف.. وبباغين يتزوجو ولكن بطالتو كانت حاجز.. حنا بربعة كنا عايشين فالكابة.. وقلة ذات اليد الباب لي طرقناه كيتسد فوجهنا كثرو الديون والمشاكل..فقررنا نكونو.. عصابة.. نطقها وانا نشهق خنزر فيا.. هبطت عيني باش يكمل.. سكت.. تنهد وكمل.. خدمنا طيلة الاربع سنوات الماضية بالعقل حتا واحد مقدر يممسك علينا زلة او دليل كنضربو ضربة اولا زوج فالعام وكنغبرو حتا ينساونا تحركو فايدينا الفلوس ودرنا مشروعاتنا... وبغا فهد يدير العرس ولكن بسمة ولات كتتهرب.. خصوصا ملي قررنا نحبسو العمليات هي ونوفل اعترضو..
وتشبتو اننا نكملو
حيت ذاقو الفلوس كبرت كرشهم ومابقاوش قانعين..
حيت فهد هو الرئيس والعقل المدبر ميقدروش يستغناو عليه.. رجعات بسمة.. لعبات بعقلو.. ودارت بيه كيف الحية وقنعتو بالضربة الكبيرة.. واخر عملية.. لي كانت اليوم فالصباح بكري.. هي ونوفل.. كان فالخطة انهم ياخدو من عندنا الفلوس ويتسناونا فالسيارة علا منمحيو معالم السرقة.. والبصمات.. ولكن هوما غدرونا.. ملي خرجنا بزوج انا وفهد.. لقيناهم مكينينش ولقينا نفسنا امام سيارات الشرطة لي كتقرب.. عرفنا انه تلعب بينا من طرف نوفل وبسمة.. ومالقينا امامنا من غير خيار الهرب ولكن فالمطاردة تصاب فهد.. عرفنا من بعد من مصادرنا انهم.. تشافو فالمطار.. مباشرة بعد العملية اذن.. كلشي مخطط رغم ان فهد عندو ذكاء.. خارق ولكن الحب كان عاميه.. مقدرتش نديه للمستشفى حيت الشرطة غتكون كتقلب علينا..جبتو لمخبآنا لي هو هاد الشقة ديالو.. وخرجت نقلب علا طبيب.. ولكن ملقيتش.. وتسنيت.. نشوف شكون غيسالي الخدمة فالكلينيك وخرجتي نتي..سولت وعرفت انك ممرضة تماك .تبعتك نستعطفك ولكن نتي.. تسرعتي وضربتيني.. جوري ههههههه شفتو تزير صافي كمل سمحلي. نبيل: اضطريت نستخدم.. القوة...والباقي راك عرفتيه.. دابا كملي عشاك.. صوت: دابا غتوصلها وترجع لعندي غنسافرو ..نبيل: ولكن راك.. مازال مكملهاش الشخص لي كان مسند علا الحيط ومقوس من الالم طاح فالارض واهن... قربنا نعاونوه.. لكن.. رفض.. وبقا معاقر ينوض بوحدو.. مرفضتش المساعدة فحد ذاتها رفض الشفقة.. ماشي جرح ذراعه فقط لي كيتالم من وجعه..ولكن..جرح قلبو.. انسانة بغاها لسنوات وباش يتزوجها دخل فالطريق الممنوع.. وخسر نفسه وضميرو وكان غيخسر حريته وحياته غدراتو.. وخانتو وهربات مع شريكه فالسرقات مع اكبر غنيمة..
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
youssra



المساهمات : 184
تاريخ التسجيل : 28/07/2017

مُساهمةموضوع: رد: الفهد الجريح للكاتبة : sima wise (سامية اد لامين SAMIA ID LAMINE)   السبت يوليو 29, 2017 3:00 am


ناض ووقف مع الحيط.. مقبش فيه والالم واضح علا ملامحو وصل للغرفة.. وفتح خزانة كيجبد شي حوايج واوراق بعشوائية.وهو كيكتم صوت انينو.. بحال شي وحش مجروح مكسور كيكون اخطر فديك الوقيتة وعدواني ويصعب الاقتراب منو.. شاف فيا بشرارات من نار فهد: شنو بغيتي الا خديتي مستحقاتك تقدري تمشي ..كنت ساهية فيه فملامحو فعضلاتو.. كلشي فيه رغم تعبو زوين قربت خطوة وهو مازال مكشر.. وكنشير بسبابتي جوري: ا ء دابا هو خصني نبدل ليك.. الضمادات راه عمرو بالدم وخصك ترتاح بعدا حتال تطلع الشمس. فهد: بدلي الفاصمة وسيزي عافاك.. مشيت نجبد العلبة. وكنتسناه يتمدد.. جوري: مغتنعسش علا ظهرك.. فهد: لااا سربي معنديش الوقت.. هزيت ضمادة ومعقم وشوية دالقطن ووقفت قدامو..وهو مازال مسند علا الخزانة لي كان كينبش فيه.. حسيت بالتوتر وخدودي ولاو بلون اسمي... مبقيتش قديت نظم تنفسي.. وهو كان محافض علا نظراتو الحادة وتكشيرتو المعهدوة... حطيت القطن... لي فيه لالكول علا الجرح.. زآر وضرب باب الخزانة. . من الحريق.. حطيت ايدي علا صدرو.. سمحليا سمحليا.. وحيت كان عريان من الفوق .ضربني الضو بمجرد قست جسم من الفولاذ اول مرة نشوف ديك الفورمة.. وقفت شوية وعاود رديت القطن هاد المرة تالمه كان اخف ولكن ملي جيت نلصق الفاصمة.. بلا منحس ضغطت علا الجرح الجديد.. من المو. دفعني علا الباب.. وجا قدامي فهد: ايييي واش نتي شي حد محرشك عليا.. جوري: راااه الجرح لي جديد.. ماشي انا لي قسحتك والبنج ماكاينش بقيت كنخربق فالهضرة.. وهو مراقب فمي.. بلا سابق انذار.. حط فمو علا فمي بحكم معارفة والو علا التقبيل ومعنديش ادنى خبرة كان مسلم زمام الامور وتكلف بكلشي.. لعب بشفاهي كيف بلا.. ملي فاق دفعني بقوة ولاح عليا الصاك ديالي فهد: برااااا منعاودش نشوف كمارتك كلكم.. صنف واحد... محسيتش الا ودموعي شاقين طريقهم.. علا خدي هزيت الصاك وشفت فيه نظرة انا براسي مقدرتش نفهمها حسيت بالحگرة حسيت براسي رخيصة.. لقيت نبيل واقف كيلبس فجاكيتو كانو شاف كلشي بلاميهضر سبقني للباب حلو ونزلنا فلاسنسير.. حلي السيارة ركبت حداه ونزلت الزاج دالنافذة وخليت برد الفجر ينشف دموعي... بزاف دالحوايج وقعو فليلة وحدة بزاف دالاحاسيس جداد عليا عمري حسيتهم.. فليلة وحدة قلبي دق لاول مرة وتكسر وتجرح لاول مرة بهاد الحدة.. نعت لنبيل الدار.. وجيت ننزل.. نبيل: شدني من كم التريكو.. معرفتش اسمك.. ولكن.. بغيت نعتذر منك فهد ماشي هكداك لي داز منو ماشي ساهل.. جرحو مازال جديد ..نساي لي وقع ليوم.. وكملي حياتك.. جوري: هادشي لي غندير.. انا هاد اليلة كنت ناعسة فداري ولي وقع طرا فاحلامي فقط بسلامة.. نبيل: الا كان مكتاب غتكون فرصة نتشافو.. جوري: مكنضنش.. بالمناسبة سميتي جوري.. نزلات ودخلات مع الزنقة الضيقة.. اما.. نبيل فسرح.. بخيالو كيشوف كيفاش الفهد.. حطم.. هاد الجورية.. ونثر اوراقها الهشة والرقيقة.. بقات فيه.. ولكن ملقاش لها حيلة.. دور السيارة ورجع عند صاحبو يكملو تحضيرات سفر الانتقام..
اما انا فدخلت للدار.. طلعت. دفعت علبة الدواء من تحت باب خالتي شامة.. ودخلت لمسكني وسديت عليا مابغيت نشوف حتا واحد او نهضر مع حد.. بدلت حوايجي وتخشيت ففراشي.. كنحاول ننسا بالنوم.. ولكن حلف لاهو جا.. كل مكنسدو كنتفكر فهد وقربو ليا...
وحتا ملي داني النعاس فكان بطل احلامي.. كتمر ايامي وبين العمل واحلامي بفهد مقدرتش نكرهو رغم اهانته ليا ولكن السويعات القليلة لي قضيت فشقته خلاتو يعشش فدماغي.. .

ملي كانت جوري كتعيش الحب لي. تبنا فليلة وحدة.. من طرفها.. والذكرى الوحيدة لي بقالها منو وعايشة بيها هي ديك القبلة ..لي بالنسبة لها فرست كيس.. فمكان اخر.. فالجهة المقابلة من الحر الابيض المتوسط.. كان فهد ونبيل.. مكثفين بحثهم للوصول.. لنوفل وبسمة.. سفرهم تم باسماءهم الحقيقة.. كون التبليغ لي دارو دوك زوج كان علا السرقة ديال الفيلا.. ومدكروش الاسماء.. وبما انه فهد متعالجش فمشفى مقدروش يوصلولهم....
ففندق فهد ناعس علا ضهرو وعينيه مركزين فالسقف.. كيمرر ايدو فوق الجرح... مسافر بخيالو لديك الليلة غافل علا صديقو لي كينادي باسمو..
نبيل: فهد وافهد راني كنهضر معك... فينك هيهو.. فهد: هاه شنو مالك نبيل: فيها؟! فهد: شنو لي فيها نبيل: كتفكر فيها.. فهد: غير حيت ضميري كيآنبني وصافي شنو كنتي باغي تقول نبيل: كنعرفك ملي كتبدل الموضوع كتكدب المهم.. راني عرفت نوفل وبسمة فين ساكنين.. فهد : وعاد كتقولها.. ناض وقف لبس ..بروتكال وكويرا وخشا سلاحو مور ظهرو.. نبيل: علاش ناري افهد.. فهد: بلا مايهضر تخنزيرتو كانت معبرة اكثر على براكين الغضب والشمتة لي حاس بيها خرج.. وتبعو صاحبو مسلم امرو موراه.
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
youssra



المساهمات : 184
تاريخ التسجيل : 28/07/2017

مُساهمةموضوع: رد: الفهد الجريح للكاتبة : sima wise (سامية اد لامين SAMIA ID LAMINE)   السبت يوليو 29, 2017 3:01 am



طول الطريق.. ونبيل مقابل.. ملامح فهد الغاضبة وايديه الكارزين علا الفولون.. بمجرد موصلو للعنوان.. تحلو بيبان السيارة بزوج فدقة ..بلا ماينطق فهد بضربة وحدة.. برجلو لاح الباب تسمعات.. صرخة انثوية بعد صوت تحطيم الباب.. تبعو اثرها وصلهم لاخر غرفة فالكوريدور.. وقف فهد... امام المنظر الشنيع مذهول بسمة عارية فحضن شريكو جرات ليزار بصدمة: فهد؟؟! فهد بغضب الدنيا والدين... مشا جر..نوفل.. وبقا كيضربو.. حتا وقفو نبيل.. رماه عل الارض وحط رجلو علا وجهو.. نوفل: عافاك خليني وديها.. ودي لفلوس زحف لجتب السرير وجبد من تحتو صاك كبير.. فهد: سمعتي واش سمعتيه مزيان باعك مع اول ضربة هذا باش بدلتيني كنت ساذج ملي كنت كنقول نتي ام ولادي ونضحي بروحي وحياتي علاقبلك طلعتي رخيضة بزاف.. بسمة: عافاك فهد عطيني فرقة فهد: نعطيك فرصة.. لقيتك معاه فمكان عام راني جابد من تحتو الكلبة.. العاهرة.. لاح الصاك لنوفل.. فرق هادو علا المحتاجين ومنخليهمش يستمتعو بيه.. اه بلاتي.. رجع حلو وهز ورقة مالية وحدة وشاف فنوفل فهد: معندي مندير بيها شياطتي وخليتها ليك كولها ولا لوحها ونتي هاخلاصك كنظن مبقاش عندو باش يخلصك...
جا يخرج ولكن ناض عليه عرق الرجولة الحامي.. رجع جبد المسدس شد فراسو كيحاول ايسكت الصوت لي كيقول قتلها قتلها.. دار ودار..السلاح فتآهب.. شاف فيهم بزوج عينيهم كيترجاوه.. لوهلة جات قدامو صورتها.. ولانفو عطرها.. لون عيونها ارتباكها قدامو.. توترها.. والقبلة لي حالتها فيها كتنم علا انها الاولى وهدشي مصعبش عليه يستنتجو.. عض شفاهو ابتسم جانبيا.. فهد: مكاين باش نضيح حياتي علاقبلكم وعندي علاش نعيش.. خرج لحق بصديقو نبيل للسيارة هاد الاخير هو. لي كان سايق فطريق العودة
كان كل شوية كيتلفت لفهد لي فمو ماتجمعش من الضحك حتا شك نبيل ياكما الصدمة سلسعات الراجل شد الفران واش فيها بمعنى مالك.. فهد: كتعرف فين ساكنة ههه؟ نبيل: هههه دابا فهمت.. كنعرف شنو نخطبها ليك
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
9isasBdarja

avatar

المساهمات : 11
تاريخ التسجيل : 21/06/2018

مُساهمةموضوع: رد: الفهد الجريح للكاتبة : sima wise (سامية اد لامين SAMIA ID LAMINE)   الخميس يونيو 21, 2018 2:55 pm

القصة بدون تتمة؟؟
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://9isas.modareb.info
 
الفهد الجريح للكاتبة : sima wise (سامية اد لامين SAMIA ID LAMINE)
الرجوع الى أعلى الصفحة 
صفحة 1 من اصل 1
 مواضيع مماثلة
-
» Permissibility of Celebrating Mawlid from Qur'an & Hadith!!‏

صلاحيات هذا المنتدى:لاتستطيع الرد على المواضيع في هذا المنتدى
منتدى سيما للقصص والحكايات المغربية  :: الفئة الأولى :: المنتدى الأول-
انتقل الى: